Eyþór Arnalds..

Eyþór Arnalds kom í viðtal í Kastljósi RÚV á mánudaginn var.  Ég var að horfa á þetta áðan á vefnum og verð ég að segja að hafi dómgreindarskortur Eyþórs verið mikill umrædda nótt, að þá er dómgreindarskortur hans og forustu Sjálfstæðisflokksins ekki mikið skárri í eftirmálanum, þar sem svo virðist vera sem hann muni bara labba aftur inn í Bæjarstjórn Árborgar sem oddviti Sjálfstæðismanna eftir t.d. ár, ef dómurinn verður árs ökuleyfissvipting.  Þetta viðtal við Eyþór er ótrúlegt að mínu viti, þar sem Eyþór ýmist lýsir yfir miklum dómgreindarskorti, en líka reynir að draga dul á það sem gerist umrædda nótt og ásetning hans eftir að ljósastaurinn hefur verið jafnaður við jörðu.  Hann segir að hann hafi verið “kenndur”, “drukkið ca. 4 léttvínsglös”.  Hann marg tekur fram að hans fyrsta hugsun hafi verið að athuga hvort farþegi eða nokkur vegfarandi hafi orðið fyrir slysi sem á væntanlega að gefa til kynna ábyrgðartilfinningu hans, augnabliki eftir áreksturinn.  Samt í framhaldi af því ábyrgðaratferli, þá stekkur hann aftur í dómgreindarskortinn, að eigin sögn, og lætur farþegan um að keyra.  Sá var að hans sögn búinn að drekka svipað, “jafnvel minna” en hann.  Hann leggur áherslu á að hann hafi ekki verið að flýja af hólmi, “verið í panik”, og að hann sé ekki viss um að þau hafi ætlað á Selfoss, þó þau séu síðan stoppuð í Ártúnsbrekkunni.  Eyþór er þarna ekki spurður um hversvegna “farþeginn” hafi verið kominn undir stýri sem mér þykir segja ákveðna sögu.  Við spurningunni, hvort hann hafi keyrt drukkinn áður, svarar hann afar merkilega “ég hef ekki verið að aka undir áhrifum með þessum hætti” OK?!?  Hann tekur fram að hann ætli að leita sér aðstoðar vegna áfengismála, en sér samt ástæðu til að nefna að hann telji sig ekki hafa átt við áfengisvandamál að stríða.  Viðtal þetta er allt með miklum ólíkindum, en ég held að það varpi ákveðnu ljósi á persónuna Eyþór Arnalds.  Hvaða ljós það er, ætla ég að hafa fyrir mig.

Myndirnar í húsi

Fékk þennan fína póst í dag, en þá duttu myndirnar frá London inn um lúguna.  Setti 3 sýnishorn hér í myndaalbúmið Hlaup. 

Vanaleg mánudags æfing hjá Erlu, þar sem hlaupinn var mikill brekkurhingur í Grafarvoginum.  Fyrst var hlaupið niður og undir Gullinbrú.  Upp skíðabrekkuna, niður hjá Essó og alveg niður að strönd.  Upp listaverkabrekkuna og aftur smá brekka við Hallsveg að Olís.  11 - 12 km.  Ég gleymdi Garmin heima, sem hræðilega leiðinlegt þegar það gerist. 

Annars ætla ég að gefa þessum nýja Garmi mínum gríðarleg meðmæli.  Í gær datt hann úr vasa mínum og var út á götu 6 klst, þar sem keyrt var yfir hann, allavega einu sinni, kanski oftar.  Það sé ég því að stafirnir á start/stop takkanum eru máðir af.  En að öðruleiti sér ekki á honum og allt virkar eins og það á að vera.  Hörku gripur.

Svolítið aumur..

Þegar ég lagðist til svefns í gærkvöldi (1:30), þá hafði ég þá hugsun bakvið eyrað, að sniðugt væri að taka þátt í Neshlaupinu.  Þegar ég vaknaði í morgun fann ég nokkuð fljótt að sú hugsun hafði verið aldeilis... ekki viðeigandi.  Ég fann til á hinum ýmsustu stöðum, svo hlaup með átökum voru ekki á dagskrá.  Í stað þess var Larsen á dagskrá seinnipartinn.  Það er ekki hægt að segja að það hafi verið hlýtt í dag, þó sól hafi skynið í heiði, enda sýndi mælirinn við Valsheimilið 5 gráður.  Hringur dagsins hafði það að markmiði að forðast norðvestan vindinn sem leiddi okkur að húsakynnum mínum, á heimleið, og er ekki loku fyrir það skotið að öl hafi verið dreipað á þeirri örstuttu dvöl sem þar var gerð.  19,4 km segir svakalega voðalega fíni Garmin minn og þá er það örugglega svo.

Sá júróvision upphitunina áðan -  fínn þáttur, þó Eiríkur okkar Hauksson tali nú ekki af sér.  Sem minnir mig það þegar ég og hann sátum á sunnudagskvöldi í íbúð sem ég leigði á Akureyri veturinn 85 – 86 og fullnýttum steisjónhelgi og hlustuðum á ekkert léttmeti.  Nokkrum vikum síðar var hann orðinn Aðal í júróvision.  Daninn ofvirki hefur aldrei verið betri en í kvöld og ég held að yfirleitt hafi ég verið honum sammála.

Nuddaður..

Djöfull er alltaf erfitt að mæta of seint á æfingu.  Maður stekkur út úr bílnum og hleypur í spretti af stað til að ná hópnum og það tekst kanski á 3 km og þá er maður búinn og ekki teygður og um leið fer hópurinn að bæta í.  Þetta gerðist í gær, rétt náði liðinu áður en lagt var í brattann á Úlfarfellinu.  Hef fengið svona 500 metra til að ná önduninni í lag, áður en lagt var í’ann.  Tókst að halda mér á hlaupum allaleið að efsta einstiginu og það held ég að ég hafi ekki gert áður.  Fyrstur var ég að stönginni, sem bæ ðö vei liggur á hliðinni  upp á Úlfarsfelli.  Golli kom næstur, Birgir og Erla saman og síðan Sigríður en meir veit ég ekki.  Skilst þó að sumar konur hafi næstum verið farnar norður af Úlfarfellinu í átt til Mosfellsbæjar, en þó rambað á rétta niðurleið.  Rúllið heim var fínt, þar sem hlaupið var meðfram Vesturlandsvegi og alla leið niður í vog áður  en aftur var tekin brekkan upp að laug.  12 km höfn og ekki þarf að hafa áhyggjur af þeim meir.

Var í heilnuddi áðan í fyrsta skipti á ævinni – þvílík snilld.  Það skal þó alveg viðurkennt, að þetta var líka auðvitað djöfullegt, þó ég nefni bara olnboga í rasskinn af handahófi, sem dæmi.  Síðan varð ég auðvitað svolítið foj þegar hún fó að nudda á mér höfuðið og greiðslan bara fauk út í veður og vind.  Hvað var það hjá henni?

Á bol og stuttum

Það að hlaupa á bol og stuttum er auðvitað snilldin ein, það hefur verið hægt þessa síðustu daga.  Hlaupin hjá Foringjanum eru komin í ákveðið horf fyrir sumarið, þar sem mánudagar verða “líðandi í 50 mín” (alltaf hálfgert keppnishlaup í lokin hjá sumum), miðvikudagar eru bland í poka með brekkusprettum, tempóhlaupum og intervalhlaupum og loks fimmtudagar með aðeins lengri hlaupum, brautarhlaupum eða Úlfarsfellinu.  Laugardaginn sér fólk um sjálft eða í smærri hópum eins og maðurinn sagði.  Dagurinn í dag bauð upp á 6*3*2 (6 sinnum þriggja mínútna hratt hlaup með tveimur mínútum rólegum á milli – þetta verður ekki útskýrt aftur í sumar).  Golli var mér helvíti erfiður á æfingunni í dag, nú í fyrstalagi hleypur hann hraðar en ég (reyni að vera honum erfiður í Úlfarsfellinu á morgun) og í öðrulagi þá er hann Sjálfstæðismaður sem hefur þá undarlegu lífsskoðun að allt skuli verðlagt af markaðnum... nema lóðir!  Um þær á að gilda sósíalismi.

Hvað eru þeir að spá..

Ég eiginlega verð að tjá um stöðu "Baugsmála", eða rétta athugasemdir Jóns Ásgeirs og félaga í gærkvöldi.  Eru þessir menn ekki alveg í lagi.  Jón Ásgeir hefur verið einn aðaleigandi DV undanfarin ár og það er nú ekki eins og það hafi alveg fylgt þeirri reglu að "ég á rétt á því að um slík mál sé aðeins fjallað fyrir réttum dómstólum".  Hvaða væl er þetta í þessum mönnum og hvaða dylgjur eru þetta um starfsfólk Kastljósins.  Neitið að taka þátt í umfjölluninni, en hættið þessu væli út af umfjöllun Kastljósins, þau hafa reynt að mér finnst að vera eins hlutlæg og frekast er unnt.

Það er svo sem best ég segi það, fyrst ég er byrjaður, að ég hef reyndar alltaf haft ákveðna samúð með Baugsfjölskyldunni í þessu máli og þá sérstaklega út af því hvernig til þess var stofnað.  En þetta eru nú ekki englar og því verður málið bara að hafa sinn gang úr þessu.

Þetta er snilldin ein..

Það var ekki með mikilli ógleði sem ég smellti mér í hlaupaskóna í gærmorgun, klæddur keppnismúnderingu frá London og skundaði strandlengju Reykjavíkur á rúmum 2 tímum.  Ég get nú ekki sagt að margir hafi verið komnir á ról á stíga borgarinnar, en þvílík blíða.... mér flaug í hug að ég væri kominn til Húsavíkur. 

Núna liggur ljóst fyrir að horfa verður til framtíðar og finna sér ný markmið að stefna á.  Laugavegurinn er klárlega á dagskrá um miðjan júlí, spurning hvað maður tekur með.  Ætlaði alltaf að taka á því upp á Skaga í lok mánaðarins í hálfu, en er ekki viss eins og staðan er í dag.  Spurning hvort maður mæti og taki þetta sem æfingu... get ég það.. já já sýndi það í Vormaraþoninu.  Nú nú, Heilsuhlaupið tek ég,  mætti ekki í fyrra, en á þaðan fínar minningar frá 2004.  Svo væri snilldin ein að taka Mývatnsmaraþon (sem æfingu) eða negla á hálft af krafti.  Svo eru þarna Bláskógaskokk og Þorvaldsstaðaskokk (hvaða skokk kjaftæði er þetta?!?!?), þau eru spennandi og ennþá hálfur mánuður í Laugaveginn.  Jæja þarna er sumarið hálfnað og lappirnar á mér væntanlega ónýtar svo ég læt þetta duga.  Heyrði samt einhverja vera tala um Berlín um daginn.

Opið hús í leikskólanum hjá Ástríði minni á laugardaginn, þar sem ýmis afrakstur vetrarins var sýndur og börnin voru með skemmtiatriði.  Þetta var allt saman flott og fínt, enda Grandaborg virkilega góður leikskóli (eins og allir vita er leikskólinn bara fólkið sem vinnur þar, hitt er steypa).  Það sem skiptir samt öllu máli með leikskólana er þetta, að börnin hafi gaman að því að vera þar og það gerir Ástríður.  Að hún kunni að reikna og skrifa, teikna eins og Kjarval, spila á gítar eins og Bubbi eða bara "what ever" er bónus - ekki skilyrði.  Hún á að vera glöð!

Hvar fær maður ódýra sólarvörn

Ég vil skora á fólk að hamstra sólarvörn, því það er gjörsamlega að bresta á ofurblíða.  Fór á veðurvef Moggans áðan og í framhaldinu var ekki annað að gera en rífa sig úr að ofan, til að venja sig við það sem koma skal.  Held ég drattist bara niður í Laugar og taki smá hlaup. 

Lítið að gerast..

Það er ekki hægt að segja að ég sé að láta hlaupin angra mig sérstaklega þessa dagana.  Fór 10 km á sunnudaginn (á stuttbuxum), ætlaði 13 en snéri við eftir 5 þar sem lappirnar voru ekki alveg að gera sig.  Tók 5 í gærkvöldi, mikið betri en samt ekkert hlaup í dag sökum vinnu og Icelandair hlaupinu sleppi ég, þar sem einstaklingi er boðið að koma fyrir hönd Inspira út að borða annaðkvöld og ég fæ að fara - heppinn.  Opin kerfi eru svona rausnarlegir en auðvitað þarf jú eitthvað að hlusta í staðinn.  Það er fordrykkur milli 18 - 19, ekki nokkur ástæða til að láta bíða eftir sér.. mæti 17:59.  Boðið verður upp á Peter Lehman Weighbridge Chardonnay - hvítvín og Peter Lehman GSM - rauðvín með matnum... síðan verður opinn bar - gott skipulag.  Árans... ég á bæði fund klukkan 9:00 og 10:30 á föstudaginn, muna að kaupa tyggjó.

Allur að koma til..

Afleiðingar maraþonsins eru í rólegheitum að hverfa úr manni og geri ég fastlega ráð fyrir að taka létt jogg á morgun sem fylgt verður eftir með heitum potti.  Fór á heimasíðu London maraþon í dag til að tékka hvort einhverjar myndir hefðu náðst af manni og ekki síður hvort þeir hefðu getað vingsað þær úr.  Svo vildi nefnilega til að undirrituðum tókst með stórkostlegum asnaskap að skemma númerið kvöldið fyrir hlaup.  Þetta skal ég allt fara yfir, ef ég nenni að skrifa nokkrar línur um þetta hlaup á næstu dögum.  Hvað um það, ég fann fullt af myndum, því þeir hjá London maraþon gefa manni kost á að sjá fullt af myndum með hlaupurum með svipuð númer og ég hafði.  Þarna gat því að líta mörg af félögum mínum úr ferðinni, eins og Rakel, Gunnlaug, Ingibjörgu, Valgerði og örugglega fleiri.  Það er síðan önnur saga að ég held að það sé ódýrara að borga undir einkaljósmyndara frá Íslandi heldur en kaupa af síðunni... spái í það næst.