Jyske alperne..

Enginn Foringi á æfingunni í dag, tómt kæruleysi bara, eins og það sé eitthvað gaman að vera á vellinum í Þýskalandi að horfa á leik Ítalíu - Ástralíu.  Ok jú það er pínu gaman.  En æfingin var samt þokkaleg bara, ekkert gert með planið hjá Foringjanum og því hlaupinn brúarhringur í þessari líka fínu rigningu.  Ekkert er nú betra en rigning, nema ef vera skildi þegar það er þurrt.  Ég er nú aðeins þungur eftir laugardaginn, en það verður farið á morgun.  Verra að ég er svolítið slæmur í bakinu um þessar mundir, vonandi næ ég að hlaupa og teygja það úr mér á næstu dögum.

Svolítið klúður hjá mér að vera að hverfa af landi brott á miðvikudaginn og missa af öllum hlaupunum um næstu helgi.  Hefði tekið Þorvaldsdalshlaupið, en það bíður næsta árs.  Ég er að fara í æfingabúðir út af Laugavegshlaupinu á erlendri grundu og það var eftir talsverða íhugun að ég komst að því að Danmörk væri staðurinn.  Brekkusprettirnir verða teknir sérstaklega fyrir þarna úti.

Sá einu sinni sjónvarpsauglýsingu fyrir reiðhjól í Danmörku, fyrst kom mynd af Vejle og sagt meðalhæð yfir sjó 3 metrar, svo mynd af Horsens og sagt meðalhæð yfir sjó 5 metrar og einhverjir fleiri staðir voru nefndir en loks kom "Hvem for fanden har brug for mountain bike?".   En það gerði ég, var aldrei á öðru en fína fjallahólinu mínu og því er eðlilegt að ég fari til Danmerkur að undirbúa íslenskt fjallahlaup.